Txan fantasma

Karmentxu umezurtza da eta bere izeba Edurnerekin bizi da. Bakarrik izanik, bere logelan, jostailuekin irudimenezko unibertso bat sortzen du. Egun batean, Txan fantasma agertzen da eta bere bizitza guztiz aldatzen da. Elkarrekin jolasean, berriketan, barrez, primeran pasatzen dute. Etxekoek, ordea, ez dute fantasma ikusten, neskatoa burutik gaizki dagoela uste dute. Orduan, Karmentxu eta Txan bidaia bat egiten dute jaietan dagoen herri batera iritsi arte. 

Istorio honen bitartez, lagun “imajinarioa” eta haur “berezien” integrazioa planteatzen dira.

Mariasun Landaren izen bereko istorioan oinarritutako Txan Fantasma txotxongilo antzezlana egiteko hasierako ideia 2014 hasieran sortu zen Bilboko Pantzart eta Sestaoko Bihar Txotxongilo Taldearen artean. Mariasun Landa euskal literaturako idazlerik itzulienetako bat da.  Emanaldia Titirijai Tolosako Nazioarteko Txotxongilo Jaialdian estreinatu zen, 2014ean. Orain, aire berri batekin, Pantzart Konpainiatik bertsio berri bat egitea proposatzen dugu, espazio mota guztietara egokitzeko.